التعليم فى كندا

السلام عليكم و تحية عطرة لاعضاء المنتدى

أنا ها اتكلم عن التعليم فى كندا و هذا من خلال دراستى و عملى فى الجامعة. أنا فى رأى دى أهم شئ فى كندا و هذا الدافع الاساسى للهجرة لأغلب الناس. ايه الفرق بين التعليم فى كندا و فى مصر؟ أنا هابدأ أولا بالطلاب من خلال تعاملى معهم اثناء عملى كمعيد. أغلب الطلاب هنا بيعتمدوا اعتماد كامل على نفسهم و عدد كبير لايحضر المحاضرات لانشغاله فى العمل لدفع مصاريف الجامعة. الطلاب بيتخرجوا متأخر عن مصر. الطالب ممكن يحصل على البكالريوس على سن 24 الى 26. و هذا بسبب اهتمامهم للحصول على خبره فى العمل قبل التخرج CO-OP Work و بالاضافه لدفع مصاريف الدراسة. الجامعة بتكون المسئوله عن توفير الوظائف و الاتفاق مع الشركات الكبيره. وطبعا فى جامعات ترفض عمل CO-OP - هذه غير مناسبة نهائيا للاجنبى. لما تتخرج بيكون عندك تقديرين تقديرك فى العمل و تقديرك الاكاديمى. الطالب بياخد البكالريوس و معاه سنتين الى ثلاث سنين خبره و معه مراجع اكاديمية و عملية و هذا يسهل عليه العمل. طبعا مشكلة الطالب فى مصر عند التخرج عدم وجود خبره عملية - فقط دراسة اكاديمية و هى غير كافية. امكانية حصولك على منحة لو تقديرك اعلى من 80% يعنى A-. و للعمل فى وظائف CO-OP لازم التقدير يكون على الاقل B+. هذا كله يدفع الطالب للدراسة لتوفير المال و للحصول على فرص عمل. فى مصر الدراسة الجامعية مجانا و فى عدد من الطلبة هم عبء حقيقى على الجامعة. الطالب لما يشعر انه لا يحب القسم الترم اللى بعده يحول على طول لان ده مستقبله و التحويل لااغلب الكليات مرن جدا.

بالنسبة للجامعة. مصادر دخل الجامعة متنوعة مثل مصاريف الطلاب و الطلاب الاجانب تحديدا. الطالب الاجنبى يدفع تقريبا أكثر من ضعف مايدفعه الطالب الكندى ( انا الماستر كلفنى 14 الف دولار و هو مبلغ رخيص مقارنة بجامعات امريكا و هذا بخلاف نفقات المعيشة) وايضا مصادر مالية من الحكومة الكندية و شركات تدعم الجامعة فى مشاريع للطلاب. الجامعات الامريكية افضل من الكندية فى الدعم المالى للمشاريع و هو متوفر بشده و بارقام كبيره. اغلب الافكار العلمية تبدأ من الجامعة ثم تطبق فى الحياه العملية. الجامعة دائما تكون لها مجال تكون مميزه فيه و هذا عكس النظره السطحية السائده عندنا اننا ننظر لترتيب الجامعة. ممكن تقول الجامعة هذه مميزه فى ابحاث Learning Objects. عامة افضل جامعة فى هندسة و علوم الحاسب فى كندا فى معظم الابحاث هى جامعة Waterloo. الجامعات الكندية ليست مثل الجامعات البريطانية لذا لايوجد اى Confidential Report عن الطالب و هذه ميزه. و لمن لايعرفه - لما تتقدم طلب فى وظيفة ممكن يتطلب التقرير السرى عن الطالب من الجامعة و هذا احيانا يسبب مشاكل - طبعا لو كان متطبق فى مصر كان استغل استغلال سيئ.

دكتور الجامعة. الطلاب دائما وفى نهاية كل ترم لازم يقيموا الدكتور او المعيد و متاح لهم كتابة التعليقات. و هذا التقيم يؤثر على بقاء الدكتور و هذا شئ ايجابى. الدكتور له الحرية فى تطبيق الاسلوب التعليمى اللذى يراه مناسب. مثلا فى دكاتره لايحبون الطلاب يحفظوا اى شئ - يسمح لك تجيب معك الكتاب او ملخص لك. و الميزه هنا الامتحان كله بيكون عملى و فعلا يميز بين الطلاب. و الامتحان النهائى ليس المقياس الوحيد على تقديرك. لان التقدير بيكون موزع على واجبات و مشاريع و بحوث. أجمل شئ هى الواجبات و المشاريع و بتأثر على التقدير. تجبر الطالب على الدراسة و بتكون المنافسة شديدة. البحوث لها اسلوب معروف للكتابة الدكتور و يحدد الدكتور مثل الكتابة بااسلوب IEEE. هذا تدريب كويس للطلاب و بيعلمهم اسلوب الكتابة الصحيح للتعبير عن افكارهم و ممكن يقوموا بنشر الموضوع فى مجله لو كان جديد. الدكتور لو عجبته فكره طالب بيساعده على نشرها و يقوم بارشاده لكيفية تطوير الفكره. وطبعا لو فى كلام نقله من مرجع دون ذكر المرجع. هذه جريمة و ممكن تؤدى لرفضه plagiarism. وفى طلاب بيترفضوا سنويا بسبب الحركه دى و طبعا دول مستقبلهم الاكاديمى تقريبا انتهى لان مافى جامعة ممكن توافق عليهم مره ثانية. دكتور الجامعة هنا سلطته اكبر بكثير من سلطة الدكتور فى الجامعات المصرية. يقدر يجعل الطالب يتقبل حتى لو الطالب غير لائق لكن لو الطالب خذله هذا بيأثر على سمعته فيما بعد. لو الدكتور سقط طالب انتهى الموضوع - الطالب ممكن يجيب محاميين و خلافه لكن رأى الدكتور هو الاصح فى النهاية - هذه نقطة سلبية. الدكتور مطالب سنويا بنشر نشريتين Publication على الاقل. و هذه بتأثر على ترقيته و ممكن يترفض بسببها - لازم الدكتور يكون على دراية بااحدث الاشياء. مرتبات دكاتره الجامعة جيده من 70 الف الى 150 الف تقريبا. هذا على حسب الدكاتره اللى سألتهم. و الفارق طفيف بينه و بين العمل فى المجالات الغير جامعية. فى الشركات الكبيره المرتب ممكن بيبدأ من 65 الف تقريبا للحاصل على البكالريوس ولا يوجد حدود. أجمل شئ هنا انك لو معك ماستر مرتبك بيكون اعلى من اللى معه بكالريوس فقط و هذه نقطة ايجابية تشجع على التعليم و انك تكون على دراية باخر التطورات فى المجال. و ان الدراسات العليا لها اهمية و ليست مجرد شهاده تعلق على الحائط.

بالنسبة للكتب و المناهج العلمية. الكتب الدراسية هى نفسها اللى بتتدرس فى مصر و لا فى اى فرق. الفارق بيكون فى امكانية الحصول على النشريات و التى هى مجانية للطالب - لان الجامعة بتكون متعاقده مع مجلات كثير و هذا شئ مهم للاطلاع على اخر الابحاث.

الشئ الجميل هنا نظام كليه الطب و هو مختلف نهائيا عن مصر و امريكا. الطب فى امريكا 6 سنوات. لكن فى كندا 4 سنوات. لكن يجب انك تكون حاصل على بكالريوس قبله. انا ممكن اقدم على كلية الطب و لان الماستر عندى مرتبط بـ Medical Imaging ممكن ادخل بمنحة. هذا الشئ الجميل هنا المرونة فى التعليم. المرونة تجعل الطالب يختار المجال اللى يرتاح ليه و يقدر يحقق طموحه و طالما بتعمل اللى عليك كل شئ ممكن.

أترك لكم التعليق عن التعليم عن مصر.انا اعتبر الدراسة فى كندا اسهل من مصر و التعليم فى مصر جيد فى حدود الامكانيات المتاحة للجامعة. هذه وجهة نظرى. و أحب اعرف وجهات نظركم. 


عرب كندا أول و اكبر دليل عربى كندى على الانترنت 
http://arabcanada.blogspot.com/