التعليم فى مقاطعه كيبيك

بناء على طلب الاخوه الاعزاء بافتح الموضوع ده وحاضيف فيه معلومات عن مختلف مراحل التعليم فى كيبيك
لان الموضوع واسع جدا حبدا بمعلومات عامه ولو حد عنده سؤال معين يتفضل يكتبه وحاحاول اجاوب على قد علمى
لو فيه حد من الاخوه و الاخوات عنده معلومات يقدر يعلق على الموضوع فى أخر الصفحة " يكتب تعليق " و ان شاء الله هنرد علية فى أقرب وقت ...

انا حتكلم عن التعليم فى كيبيك بالذات لانى للاسف معرفش نظام المقاطعات التانيه
مراحل التعليم كالاتى
1- ابتداءي 6 سنين primaire
2-ثانوى 5 سنين secondaire 
Cégep 3-تلات سنين وتخد دبلوم او سنتين تخصص قبل دخول الجامعه
4- جامعهUnivesité 
تلاته او 4 سنين فى معظم الجامعات

الكبيبكين اللى اتعلموا هنا فى مدارس فرنساوى ملزمين يودوا اولادهم مدارس ابتداءي حكوميه فرنساوى او لو عايزين يدخلوهم انجليزى لازم يدخلوهم مدارس خاصه
لو الاب او الام اتعلم فى مدارس انجليزى يبقى من حقه يدخل اولاده مدارس حكوميه انجليزى او فرنساوى
بصراحه مااعرفش لو المهاجرين الجداد لهم الاختيار ولا لازم يدخلوا ولادهم فرنساوى

بالنسبه للسيجيب cégep
فدى مرحله بين الثانوى والكليه 
بما ان الثانوى هنا 5 سنين وبيبدا بعد الابتداءى(مافيش اعدادى) فبيبقى كان الواحد مخلص تانيه ثانوى من بتاعه مصر
بعد الثانوى بيبدا cégep اللى تعتبر يااما فتره تحضيريه للجامعه وفى الحاله دى بتبقى سنتين فى مواد معينه بتحضر لدخول كليه او ممكن الواحد يدرس فيها technique فى مجاله لمده 3 سنين ويتخرج بدبلوم 
ادى الرابط اللى بيدى كل التفاصيل عن ال cégep 
http://www.fedecegeps.qc.ca/index.php?section=13

وده رابط فيه مكان كل واحده فيهم
http://www.fedecegeps.qc.ca/index.php?section=14

نظام التعليم هنا مرن جدا(مثلا فيه كذا نوع شهاده فى الكليه مش بس البكالريوس و الطالب له الحق فى اختيار بعض المواد الخ) م ولذلك بيبقى اوقات صعب شويه يتفهم للى متعود على نظام التعليم فى مصر
فلو فيه اى استفسار عن اللى باكتبه ياريت تسالونى على طول

هل المدارس الدارسه باللغه الانجليزيه بقوة المدارس الدارسه باللغه الفرنسيه ؟ 
لانني سمعت معلومه سابقه ان المدارس الفرنسيه في كيبك اقوى للاطفال وكذلك الانشطه اكثر؟
.هل المدارس الحكوميه الانجليزيه يمكن الالتحاق بها بمصاريف ام لابد ان تكون مدارس خاصه للمهاجرين الجدد ؟ كام تقريبا ؟

لكل منطقه (ممكن تحتوى على كذا حى) فيه اداره مدرسيه commission scolaire
فرنساوى واداره انجليزى 
كل اداره من دول مسؤله عن مدارس الحى(ابتاءئ و ثانوى) للغه بتاعتها وهى اللى بتدى لكل مدرسه التمويل الخاص بانشطتها
الادارات دى بتاخد تمويلها من وزاره التعليم ومن ضريبه المدارسtaxe scolaire اللى بيدفعها اصحاب البيوت للحى
فكل ما يبقى الحى راقى واتمان البيوت فيه غاليه كل ما تمويل مدارس الحى اعلى وده طبعا بيساعد على ان مستوى المدرسه يبقى احسن وانشطتها اكتر
العامل التانى بتوقف على المدرسه نفسها والمجهود اللى بيبذله المدير او المديره والمدرسين
كل ده مالوش دعوه باللغه
يعنى ممكن تلاقى مدرسه ممتازه انجليزى فى حى ومدرسه ممتازه فرنساوى فى نفس الحى او فى حى تانى
الفرق فى موضوع اللغه بيبقى فى عدد المدارس الانجليزى اللى اقل طبعا من الفرنساوى


كل المدارس الحكوميه مافيهاش مصاريف تقريبا(مجرد مبلغ بسيط عشان الكتب)
ومش ممكن تدفع عشان تدخل طفلك فى مدرسه مالوش الحق يروحها(لانها مثلا فى حى غير اللى ساكن فيه اوبلغه مختلفه)

فيه كمان فى بعض الاحياء مدارس حكوميه مختلفه زى المدارس اللى بتدى برنامج international او بتدى نظام لغوى مختلطimmerssion linguistique 
فالطفل يدرس كل المواد الفرنساوى نص السنه وبالانجليزى النص التانى

ده مثلا رابط للاداره بتاعه مدارس مونتريال الفرنساوى
http://www.csdm.qc.ca/

ودى كل الادارات فى كيبيك
http://www.fcsq.qc.ca/RepertoireCS/Internet/liste.asp
ممكن طبعا تدخل الطفل مدرسه خاصه فى اللغه اللى انت عايزها
مصاريف المدارس الخاصه بتختلف
فيه بعض المدارس الخاصه بتاخد مساعدات من الحكومه وفى الحاله دى ممكن تحسب بين 4000 و7000 دولار فى السنه
اما المدارس الخاصه اللى ما بتاخدش مساعده فالسنه ممكن تبقى 6000 و10000 فى السنه

لو سمحتي يا مدام أجازة بالنسبة لأولادنا اللي بيدرسوا بالأنجليزي وكذلك الوضع للي بيدرسوا بالعربي هايعملوا إيه لما إن شاء الله يروحوا كيبك وقالت الحكومة الكيبيكاوية إنهم لازم يدرسوا بالفرنساوي وإحنا طبعاً عندنا أولاد في سنوات إبتدائي مختلفة هيبقي إيه العمل إزاي الولاد تكمل تعليمهم وبالفرنساوي اللي هما مايعرفوش عنه حاجة خااااااااالص
مع خالص شكري وتقديري لمجهود حضرتك

موضوع الاطفال اللى بيوصلوا مع اهلهم من غير ما يعرفوا فرنساوى موجود كتير هنا
لذلك فيه مدارس كتيره بتعمل فصول مخصوصه للاطفال اللى لسه واصلين ,بالذات فى مرحله الثانوى لان الصغيرين بيتعلموا بسرعه جدا حتى لو دخلوا على فصل عادى 
فى الاول بتبقى صعب شويه لكن المدارس بتساعدهم(خصوصا المدارس اللى فى احياء فيها مهاجرين كتير) والاولاد كمان ماشاء الله بيتاقلموا وبيتعلموا بسرعه

وادى الرابط اللى بيتكلم عن الخدمات دى
http://www.formulaire.gouv.qc.ca/cgi...er=739&table=0

رابط مهم عن نظام التعليم فى كيبيك

http://www.immigration-quebec.gouv.q...ion/index.html

زميلتي في العمل عندها بنات وعاوزه تعرف ان كان في مدينه مونتريال مدارس راهبات
وهل هي بالمصاريف ولا مجانيه
شكرا مقدما

المدارس الحكوميه هنا ملهاش صفات دينيه ولكن صفات لغويه (فرنساوى او انجليزى)
فللاسف زميله حضرتك ماينفعش تدخل اولادها مدرسه حكوميه لو عايزه مدرسه راهبات
فيه طبعا مدارس راهبات خاصه بمصاريف
للاسف ماعرفهمش كلهم لكن دى مثلا واحده
http://www.marie-clarac.qc.ca/fr/

لمعرفه الباقى ده رابط عليه المدارس الخاصه فى كيبيك
http://fr.wikipedia.org/wiki/Liste_d...du_Qu%C3%A9bec

http://privateschool.about.com/od/to...n_Montreal.htm

بالنسبه للاولاد الى مهاجرين جديد فى سن 9 سنين ياترى ايه الاوراق الى بتبقى مطلوبه من مصر علشان التقديم فى المدرسه؟؟؟؟
وهل ياترى بيبقى فى امتحان اواختبار تحديد مستوى مثلا او حاجه زى كده ليهم
ولا بيتوزعوا تبعا لسنهم علطول؟؟؟؟
كمان بالنسبه للمناهج ياترى زى الى هنا فى مصر ولا مختلفه؟؟؟؟
معلش اسئله كتير وبتعبك معايا
تحياتى لحضرتك

بالنسبه للمدارس الحكومى(مدرسه الحى اللى منطقه السكن تابعه لها) اللى بيحتاجوه هو اوراق الهجره للطفل والابوين واعتقد انهم بيدخلوه سنه معينه حسب سنه
مافيش امتحان الا لو داخل على مدارس معينه (école à projet particulier, école alternative) دول بيبقوا مدارس حكوميه ولكن متخصصه فى الموسيقى مثلا او فى الرياضه او بنظام التعلم بالمشاريع
فى المدارس دى بيبقى فيه امتحان للدخول 
بالنسبه للمدارس الخاصه فمعظمهم بيعملوا امتحان ويمكن يحتاجوا شهاده الميلاد مع ورق الهجره

نظام التعليم هنا مختلف جدا عن مصر وخصوصا ان الحكومه غيرته من كام سنه 
بصراحه صعب جدا على انى اشرح النظام الجديد لانه مافيهوش مقاييس ثابته ولكن ححاول

الفكره فى النظام الجديد هى ان الطفل يتعلم ازاى يدورعلى المعلومات ويجمعها عشان يستخدمها لحل مشكله عمليه بدل ما يحفظ معلومات عشان الامتحان وبعدين ينساهم
تقييم الطفل بيقوم على مبدا سرعه تقدمه بالنسبه لنفسه مش بالنسبه للاطفال التانيين فى الفصل

انا عارفه ان اللى يقرا الكلام ده حيقول ياسلام نظام جميييييييييل
لكن للاسف تطبيقه العملى صعب وده بيسبب مشاكل كتير لاطفال محتاجين اطار محدد للتعليم
عموما ده موضوع يطول شرحه ولكن ده مش حيغير الواقع وهو ان ده النظام الجديد هنا ولازم الاهل يتابعوا الطفل كويس اوى عشان مايتاخرش 
فى نفس الوقت ميزه النظام ده(لو اتعمل مع متابعه الاهل طبعا) انه بيطلع شباب بيعرف يفكر ويتصرف 

بالنسبه لسن 9 سنين وعشر شهور يدخل سنه كم ؟؟؟؟
وبالنسبه للاوراق انا كنت سمعت انهم بيطلبوا شهاده التطعيمات للطفل هل ده صحيح؟؟؟
ولو الاولاد مثلا بيدرسوا فرنساوى فى مصر
ايه الى ممكن نركز عليه الى بها يسهل موضوع اللغه شويه للاطفال
وبالتوفيق

بالنسبه للسن فدخول سنه اولى ابتداءى بيبقى للاطفال اللى كملوا 6 سنين فى سبتمبر
فحسب ابنك مولود فى شهر كام يدخل سنه رابعه او خامسه ابتداءئ
كل المعلومات عن الورق المطلوب والتقديم تلاقيها على الرابط ده للمدارس الحكوميه الفرنساوى فى مونتريال
http://www.csdm.qc.ca/PrescolairePri...******ion.aspx

لو الاولاد فى مدرسه فرنساوى فى مصر مش محتاجين حاجه لان لما توصلوا ان شاء الله حيتعودوا بسرعه 
لو عايزين ممكن يتفرجوا على برامج تليفزيون كيبيكى عشان يتعودوا على طريقه النطق وده رابط للتلفزيون 
http://tva.canoe.ca/
تحت émissions

وده لمدارس مدينه كيبيك
http://www.cscapitale.qc.ca/asp/listCircon******ion.asp

ممكن بقي تشرحيلي الكاليندر دي 
هي سهله بس هل الدراسه 12 شهر في السنه
انا اتلخبط
http://www.cscapitale.qc.ca/primaire...imaire_000.pdf

النتيجه دى عشان المدرسين اكتر من الطلبه
زى ما حضرتك شايف ان فيها عدد ايام العمل وعدد ايام الدراسه فى كل شهر jours de travail et jours de classe

السنه الدراسيه هنا بتبدا للاولاد دايما فى اخر اسبوع فى اغسطس وبتخلص بين 20 و23 يونيه (قبل عيد St-Jean) اللى يوم 24 يونيو
طبعا المدرسين بيشتغلوا ايام اكتر من ايام الدراسه للاولاد
اجازه الولاد بتبقى حوالى 9 اسابيع وشويه
معظم الوقت بيبقى اول ايام واخر ايام فى السنه الدراسيه اجازه للطلبه عشان يدوا فرصه للمدرسين يخلصوا اللى وراهم

فى السنه الدراسيه فيه كذا نوع اجازات
-jours de congé ايام اجازات رسميه واعياد(زى مثلا عيد العمل و كريسماس وشم النسيم Pâques)
journée pédagoqiue دى بتبقى غالبا اجازه للاولاد لكن شغل للمدرسين(تصحيح والذى منه)
congé mobile ودى بتبقى عدد من الايام الاجازه اللى المدرسه بتحطها للطوارئ زى عواصف ثلجيه جامده ولذلك الايام دى مابيبقاش محدد معادها وبيستعملوها وقت الحاجه ولو مافيش لها استخدام بيدوها برضه للولاد 

بما ان حضرتك وصلت انك تبص على ايام الاجازات المدرسيه يبقى ان اشاء الله حتنور كيبيك مع العاءله قريب

الاولاد لما يوصلوا لسن الجامعه
هل دخولهم للجامعه متوقف علي درجات يحصلوا عليها في الثانويه زي اللي في مصر
ولا كل واحد بيحدد الكليه اللي هو بيحبها ويختارها
والسؤال الثاني هل التعليم الجامعي للابناء الحاصلين علي الجنسيه الكنديه او مقيمين دائمين
مجاني او بمصروفات مقبوله ام بمصروفات عاليه 
ارجو التوضيح والاجر والثواب عند الله

هنا التعليم بيقى 6 سنين ابتداءى و5 سنين ثانوى و سنتين cegep وبعدين 3 او 4 سنين كليه 
فى اخر سنتين ثانوى الولاد بيختاروا مواد معينه حسب اتجاهم (مثلا كورس رياضه math قوى للى عايز يدرس مجال علمى) وبيقدموا للدخول فى cegep فى التخصص اللى عايزينه 
فيه تخصصات عليها طلب كتير و ال cegep بيختاروا الطلبه حسب نتيجتهم فى سنه 4 و 5 ثانوى
فى اخر سنتين ال cegep كل طالب بيبقى له تقييم )cote R) وكل كليه حسب تخصصها بيقى لها حد ادنى cote R للقبول 

يعنى فيه اختيار من ناحيه الطالب ولكن الكليات مابتاخدش اى حد حتى لو درجاته مش كفايه
بس ده مالوش علاقه خاااااالص بجنون الثانويه العامه بتاعه مصر وخصوصا ان مافيش تقريبا دروس خصوصيه ومافيش طلبه بيجيبوا 110% ومافيش فته فى القبول فى الكليات 

الطالب اللى مااتقبلش فى الكليه اللى عايزها بسبب درجاته ممكن يلاقى طرق يدخل بيها ولكن بتبقى اطول ومحتاجه شغل
مثلا لو طالب عايز يدخل هندسه عشان ياخد بكالريوس ومااتقبلش عشان درجاته مش عاليه كفايه ممكن يقدم فى جامعه فى بلد تانيه ويتقبل او ممكن يقدم على بروجرام تانى زى majeur بدل البكلريوس وبعد ما ياخد الشهاده (سنتين مثلا) وتكون درجات كويسه يقدم لدخول بكالريوس ويتقبل
او ممكن ياخد شهاده فى مجال قريب من اللى كان عايزه وبعدين يقدم للبكالريوس اللى عايزه

التعليم الجامعى هنا مدعم جزءيا من الحكومه وبيكلف تقريبا بين 3000 و6000 فى معظم الكليات فى السنه (ده يعتبر قليل جدا فى امريكا الشماليه)
طبعا فيه مساعدات حكوميهprêts et bourses
للى ماعندوش قدره يدفع

طب انا سمعت ان المصروفات الجامعيه بالنسبه للابناء يرد منها تقريبا 75% من لحكومه
والباقي يتحمله الطالب
هي دي المقصود منها المنح والقروض؟

يمكن اللى قالك علي ده يكون قصده على الضرايب

لما حضرتك بتعمل التقرير الضريبى السنوى بتحط فيه مرتبك كدخل و بتحط بعض البنود اللى بتديك اعفاء جزءى من الضرايب او بتنطرح من دخلك وبالتالى ممكن تنزلك فى شريحه عليها ضرايب اقل
من ضمن الحاجات دى بيبقى فيه بند للدراسه post secondaire للاولاد (cégep et université) 
الاعفاء اللى لك حق فيه بيتوقف على كذا عامل زى مرتبك وهل ابنك او بنتك اشتغل مثلا شويه فى السنه دى
وبعد حسابات ضريبيه ملخبطه ممكن تطلع انك تدفع ضرايب اقل بسبب مصاريف كليه الابن او البنت لكن مش بيوصل لدرجه 75% الا يمكن فى حاله اسره دخلها محدود جدا
(على فكره احنا بندفع هنا ضرايب بين 20% 50% من الدخل السنوى حسب شريحه الدخل يعنى كل ما تعمل فلوس اكتر كل ما تدفع نسبه ضرايب اكبر)

بخصوص دراسة صناعة الحلويات والمخبوزات . هل يوجد معاهد متخصصه لها؟

طبعا
ادى كذا رابط بالمعلومات

http://www.ithq.qc.ca/fr/programmes-...tion#block2724

http://www.ithq.qc.ca/fr/dep-patisserie-professionnelle

http://www.toutpourreussir.com/fr/me...p?metier_id=44

http://www2.inforoutefpt.org/guide/d...5270&QRegion=0

http://www2.inforoutefpt.org/guide/d...5297&QRegion=0

http://www2.inforoutefpt.org/guide/d...1057&QRegion=0

http://www.servicecanada.gc.ca/fra/q...ues/6252.shtml

بخصوص دراسة الطيران في كيبك ماهي معاهد الطيران الموجوده في كيبك ؟

نصيحة لله قوله يفك من الموضوع بتاع الطيران ده أصلى قتلت الموضوع بحثا واستقصيت وعرفت كل حاجة عنه ..

1- دراسة الطيران غالية جدا جدا عن الدراسة العادية ( المتوسط بتاعها من 20 الى 30 الف دولار للسنة لو فى مكان محترم ) 

2- أحسن اختيار للمهاجر هى كلية seneca لأن فيها برنامج طيران 4 سنين بكاليريوس السنة ب 10 آلاف دولار ( ارخص بكاليريوس طيران فى كندا ) ده غير انها داخلة ضمن قرض ال osap 

3- بعد اتمام ال 4 سنوات مش هتعرف تشتغل فى شكرة طيران كويسة . لازم تقعدلك بتاع 5 سنين تشتغل فى وظائف فى شركات الطيران الصغيرة على الطائرات صغيرة الحجم أو تشتغل فى رش المزارع والحقول ... وبعدها تعمل عدد ساعات طيران يؤهلك لأنك تشتغل فى شركة طيران محلية 

4- طول الكام سنة بعد التخرج اللى بتشتغل فيهم على طيارات صغيرة وفى شركات طيران محلية بيبقى مرتبك تعبان تعبان تعبان يا ولدى ( من 2000 الى 3000 دولار) وبجد والله لأنى بحث ودخلت على blogs بتاعة طيارين كنديين وشوفت الحقيقة المرة ولاحظ انك فى الكام سنة دول هتبقى مطالب انك تشتغل وكمان تدفع الأقساط بتاعة قرض osap ( أو اى قرض دراسى عموما )

مثلا ادخل على الموقع ده وشوف رواتب الطيارين والمساعدين فى الشركات الكندية ( ركز على الشركات الصغيرة لأن دى اللى هيبدأ بيها بعد التخرج بكام سنة ) وهتلاحظ المرتبات المضروبة بالنار

http://www.airlinepilotcentral.com/airlines/canadian.html


5- لما ربنا يكرمه بعد بتاع 4 او 5 سنين من التخرج ( وشوفت ناس بتقول ان بقالها 7 و 8 سنين ) بيبقى عمل عدد ساعات طيران واكتسب خبرة تؤهله للتقديم لشركات الطيران الكبيرة زى air canada مثلا ... 

6 - باختصار ... بعد بحث شديييييييد اكتشفت ان وظيفة الطيران فى اوروبا والدول المتقدمة 

ولو بحثت فى jobfutures هتلاقى ان نسبة البطالة بين الطيارين وشغلانات الطيران عموما أكبر من النسبة بين المحاسبين مثلا ده غير ان الطيارين الكويسين مرتبهم لا يزيد عن مرتب المحاسب مثلا .. ده غير ان نسبة الطيارين ال self employed اعلى ( يعنى لا مؤاخذة واحد جايب طيارة وبيأجرها بالسواق ) ونسبة اللى شغالين part time برضه اعلى من المحاسبين مثلا .. وبعدين الطيار بيخضع لكشف طبى كل فترة .. يعنى الواحد لو كبر شوية وصحته هكعت يبقى مع السلامة تروح تطير طيارة ورق 


7- لو لسة صاحبك مصر ونفسه ماتسدتش بعد اللى انا قولته ده ... يبقى هديك رابط لأكتر الكليات الكندية اللى عاملة برنامج طيران مناسب جدا من حيث الجودة والسعر وكمان داخل فى قروض الطلبة osap بتاعة اونتاريو ... وتقريبا هى الكلية الوحيدة فى كندا اللى بتدى بكاليريوس طيران والباقى دبلومات ... مش شغلانة مرموقة اوى زى عندنا فى الشرق السعيد 

http://aviation.senecac.on.ca/

وكمان الكلية دى موجود فى ال staff بتاعها البروفيسور 
adel labib
Academic Coordinator 



ايميله adel.labib AT senecac.on.ca

وفى برضه 
Ahmed Elrodesly 

ahmed.elrodesly AT senecac.on.ca.

أو يجيب ايملات ال staff كله من الموقع ويستفسر عن اى حاجة تانية ..


بس نصيحة لله ... أى وظيفة تتعلق بالهندسة أو البيزنس والمحاسبة والأدارة أفضل 100 مرة من البهدلة اللى شوفت الطيارين دول بيتكلمو عنها ده غير ان طبعا شغلانة الطيران فى نسبة risk ..

لو ممكن الرابط اللذي يحتوي على المدارس الانجليزيه في كيبك

بالنسبه لمدارس الحكومه ده رابط بكل الادارات التعليميهcommisions scolaires ( فرنساوى وانجليزى) فى كل مناطق ومدن مقاطعه كيبيك
حسب منطقه السكن والمدينه تشوف تبقى تبع اى اداره وتاخد اسمها وتعمل بحث بيه على جوجل عشان تلاقى موقع الاداره وعلى الموقع حتلاقى المدارس التابعه لها

مثلا لو اخدنا مونتريال :
فيها ادارتين هما

Commission scolaire English Montreal 
Commission scolaire Lester-B.-Pearson 
دول مواقعهم

http://www.lbpsb.qc.ca/eng/main.asp

http://www.emsb.qc.ca

عل كل موقع حتلاقى المدارس من ابتداءى لثانوى

والرابط ده عليه المدارس الخاصه

http://www.ourkids.net/school/advanced-search.php

أنا كنت عايز أسأل هيا مهنة التدربس في كيبييك ليها وضعها المادي والأدبي ولا زي مصر ....
وفي رأي حضرتك أيه هي المشاكل اللي ممكن المدرس المهاجر الجديد يوجها في البداية من الطلاب أو أدارة المدرسة بشكل عام ؟
وحضرتك لو أنا عندي الفرصة متساوية إني أشتغل في التدريس والسياحة حضرتك ترشحيلي أيه؟ وليه؟
أنا آسف أني طولت عليكي بالآسئلة لكن للآسف أنا مش لاقي أي كلام عن المدرسين في أي مندى هجرة كله عن الطب والصيدلة والهندسة . شكله أنكتب علينا أننا نكون على الهامش في أي حتة

بالنسبه للوضع الادبىى فدى مش مشكله لان كل المهن لها احترامها
المرتبات معقوله بس المهم تلاقى شغل داءم وده طبعا مساله توفيق من عند ربنا وحسب حتعيش فين
كل ما تبقى فى مدن كبيره بيبقى فيه فرص شغل كتير وفى نفس الوقت فيه منافسه كتير
الدراسه او المعادله عشان تشتغل مدرس طبعا اطول من مجال السياحه اللى ممكن تبدا فيه بدبلوم 
لو المدرسه فى حى كويس(مش من الاحياء الفقيره) مستوى الطلبه حيبقى كويس ومش حتلاقى صعوبه 
عموما لحد ماتعمل معادلتك حيبقى بقالك كام سنه هنا وبالتالى مش حتكون مهاجر جديد
لو تبقى مدرس فى ال cégep حيكون مرتبك احسن من التدريس فى ابتداءي او ثانوى
الايام دى السياحه نايمه لكن المفروض تتحسن فى السنين الجايه
الاختيار بين التدريس والسياحه ده اختيار شخصى
التدريس طريقه اطول ولكن مرتبه احسن وشغل مستقر اكتر
السياحه ممكن تشتغل فيها اسرع لكن الشغل مش مضمون و المرتب عموما اقل
ادى كام رابط معلومات

http://www.immigration-quebec.gouv.q...nseignant.html

http://www.immigration-quebec.gouv.q...n-comparative/

http://www.websysinfo.uqam.ca/regis/...ur?p_secteur=9

http://www.mels.gouv.qc.ca/gr-pub/m_englis.htm

http://www.immigrer.com/faq/sujet/Pe...concours-.html

مدرسة الإمام علي بن ابي طالب (ع) في مونتريال

من ضمن جولاتنا للتعريف بالمدارس الإسلامية في مونتريال التقينا مدير مدرسة الإمام علي بن ابي طالب في مونتريال فضيلة الشيخ بلال الجندي واجرينا معه الحوار التالي حول نشاة المدرسة والمشاكل التي تواجهها المدارس الأسلامية وسبل مواجهتها ...

مونتريال من وسيم بلوق

جريدة صدى المشرق

متى تأسست المدرسة وكيف كانت نشأتها، وما هي المصاعب التي واجهتكم ؟

مدرسة الإمام علي بن أبي طالب هي مؤسسة تربوية خاصة تأسست سنة 1991 ونالت إجازة في التعليم التمهيدي والابتدائي من وزارة التربية الكيبكية سنة 1993 ثم إجازة في التعليم الثانوي سنة 1996.

صفوفها روضة– تمهيدي– ابتدائي – ثانوي (حتى الثالث للعام الدراسي الحالي: 2003-2004).

لغاتهـــا : لغة التعليم الأساسية هي الفرنسية بالإضافة الى اللغتين العربية والإنجليزية.

مقرراتها : تعتمد المدرسة مقررات وزارة التربية الكيبكية ويخوض طلابها الامتحانات الرسمية أسوة بباقي المدارس الحكومية وهي تختار قبل بدء كل عام دراسي أحدث وأفضل الكتب المدرسية من حيث الشكل و المضمون، ثم تقوم بتدعيمها بالوسائل المساعدة في جعل المواد التعليمية غنية وسهلة الفهم.

مادة التربية الدينية تولي المدرسة مادة التربية الدينية عناية خاصة وهي تلتزم منهج الاعتدال في التعليم والتطبيق وذلك دون افراط أو تفريط.

الجهاز التربوي مؤلف من مدرسات ومدرسين ذوي خبرة وكفاءة عاليتين وجميعهم مجازون في التربية و التعليم من وزارة التربية الكيبكية.

الجهاز الإداري مؤلف من خبيرة تربوية ذات أكثر من ثلاثين سنة خبرة في إدارة التعليم، هذا بالإضافة الى إداريين متخصصين في حقل التربية و التعليم.

هل هناك مشاكل تربوية وأخلاقية، وكيف تتم معالجتها إن وجدت "كما في المدارس الرسمية "؟

لا بد أن يترافق كل عمل جديد مع عثرات و صعوبات والتي يمكن توصيفها بالمصاعب التأسيسية الطبيعية و التي من شأنها تصويب مسيرة المؤسسة وتدعيم خطواتها وذلك عبر استقراء صحيح للأخطاء، وإيجاد حلول جيدة و طويلة المدى.

و لعل أكبر مشكلة واجهتها المدرسة هي مشكلة المواصلات و ذلك في يوم افتتاح العام الدراسي الأول و بالتحديد في اليوم الثامن من شهر أيلول سنة 1993 حيث أخلّت شركة المواصلات الكندية بجميع التزاماتها وهددت سلامة الطلاب فسارعت المدرسة الى مقاضاة الشركة التي اضطرت الى إشهار افلاسها بعد فترة وجيزة.اثر ذلك سارعت المدرسة الى تأسيس شبكة مواصلات أضحت تغطي بعد عشر سنوات من العمل الدؤوب معظم مناطق مونتريال و لافال و الضواحي.

لا تخلو مؤسسة تربوية من مشاكل تربوية أو أخلاقية بل تكاد تكون جزأ لا يتجزأ من العمل التربوي و ظيفة من و ظائفه الحتمية.

و سر نجاح أي عمل تربوي يكمن في قدرته على احتواء المشاكل و إيجاد حلول سريعة فعالة لها و بالتالي بناء استراتيجية لإدارة الأزمات.

وبفضل الله، فقد استطاعت مدرسة الإمام علي بن أبي طالب خلال مسيرتها المشرقة أن تؤسس لاستراتيجية ادارة أزمات ذات رؤى واضحة و ثوابت أخلاقية قائمة على الإيمان والإلتزام حازت إعجاب وزارة التربية وجميع الأطراف المعنية من جهاز شرطة و جهاز حماية الأطفال و غيرهم من المعنين.

في العام الدراسي 2001- 2000 إحدى طالبات الصف الرابع ابتدائي أحرزت المركز الأول في مسابقة في اللغة الفرنسية من بين 24 ألف متبار، هل هناك من مراكز أخرى جديدة وما هو ترتيب مستوى مدرستكم بالنسبة للمدارس الأخرى (الخاصة والرسمية)؟

في العام الدراسي 2000-2001 أثبتت المدرسة عن كفاءة تعليمية عالية وذلك منذ السنة الأولى حيث تفوق طالبان من الصف السادس ابتدائي في الامتحانات الرسمية بمعدل 100/100 ومازالت المدرسة تحقق أفضل النتائج وتحصد أهم الجوائز حيث أن احدى طالبات الصف الرابع ابتدائي انتزعت المركز الأول في مسابقة في اللغة الفرنسية من بين 24 ألف متبار خلال العام الداراسي 2000-2001 كذلك تلقت مؤخرا إحدى الطالبات أرفع جائزة امتياز تربوية من طرف الحاكمة العامة لمقاطعة كيبك الكندية.

في العام الماضي أنشأ تجمع للمدارس الإسلامية الخاصة، أين أصبح هذا التجمع وماذا حل به؟

كان من الطبيعي أن تسارع مدرسة الإمام علي بن أبي طالب للمشاركة في تأسيس تجمع للمدارس العربية التزاماً منها بالمصلحة العامة لجاليتنا الكريمة التي نعتقد أنه لن يقوى عودها الا بالوحدة و التجمع على المصلحة العليا و لكن المؤسف أن يسقط المشروع على مفترق المصلحة الفردية و المصلحة العامة أو ان شئت على مفترق الواقع و المرتجى فهذا هو واقعنا المؤسف ان ننجح افرادا و نفشل جماعات. نسأل الله أن يجمعنا على الخير و أن يوحد شملنا.

كيف تعملون على تطوير المدرسة وما هي مشاريعكم المستقبلية ؟

بالإضافة الى الخدمات التربوية تقوم المدرسة بأنشطة ثقافية ورياضية وفنية متعددة. فللمدرسة فريق للإنشاد يشارك في إحياء الاحتفالات المدرسية .

كذلك تبنت المدرسة منهجا رياضيا جديدا يجمع بين الفروسية العربية الأصيلة و الألعاب الدفاعية الصينية يشرف عليه الأستاذ بهاء الزعبي رئيس أتحاد الفروسية في كيبك.

كما أنها تصدر مجلة مدرسية ثقافية عامة وهي تقوم دوريا بالتنظيم والمشاركة في المباريات التربوية والرياضية داخل مدينة مونتريال وضواحيها .كذلك فإنها تنظم عددا من الرحلات التربوية والترفيهية العامة خلال العام الدراسي.

مشاريعها المستقبلية تسعى المدرسة لكي يكون لها مقر واسع ثابت يلبي احتياجات وتطلعات أبناء جاليتنا الكريمة.

شكر وتنويه تشكر المدرسة كل من ساهم وما زال يساهم في إنجاح مسيرتها التربوية و كذلك تتقدم المدرسة من أسرة صدى المشرق بوافرالشكر والتقديرعلى الجهود الطوعية التي تقدمها التزاما منها في إظهار فعالية الجالية و كفاءاتها عبر دعم مؤسستها.