فيزا الزواج Partner visas

فيزا الزواج Partner visas

أسهل فيزا (نسبيًا) بتدي إقامة دايمة لأي بلد هي فيزا الزواج من مواطنة تحمل جنسية البلد.

 

نفس الكلام بالنسبة لاستراليا 

ف فيزا الزواج.. مش محتاج ايلتس و لا نقاط هجرة و لا حساب بنكي. حتى لو مش بتعرف تقرا و تكتب مش هتفرق.

مجرد الزواج من استرالية أو مواطنة دايمة استرالية يديلك الحق إنك تقدم على فيزا زوج للإنتقال و العيش بشكل دايم في استراليا و بعد ٤ سنين من تاريخ الوصول سنة منهم معاك إقامة دايمة تقدر تقدم طلب للحصول على الجنسية الاسترالية.
فيزا الزواج من استرالية بتديلك إقامة دايمة على مرحلتين

مرحلة أولى فيزا مؤقتة بتستمر :

سنتين من تاريخ تقديم طلب الحصول ع التأشيرة و دي بتسمحلك بالدخول للعيش في استراليا حتى يتم منحك الإقامة الدايمة و تقدر تسجل ف الرعاية الطبية Medicare 

بعد السنتين الهجرة هتتواصل معاك عشان تتأكد من مصداقية العلاقة و استمراريتها ..و بيتم منحك تأشيرة إقامة دايمة لو أثبت استمرارية و مصداقية العلاقة الزوجية . الإقامة دي بتسمحلك بالدخول و الخروج بشكل غير نهائي لاستراليا و بيتم تجديدها كل ٥ سنين و التمتع بكل مزايا المقيم الدايم ف استراليا (هتكون ف خلالهم قدمت ع الجنسية ن شاء الله و أخدتها و طلعت جواز سفر أسترالي فمش هتحتاج تجديدها) .

عشان تقدم على فيزا زواج؟
لازم اولا تكون متزوج من مواطنة استرالية أو مقيمة دايمة . سنها يكون اكتر من ١٨ سنة ( ولو اقل لازم وصي لها .. اب او ام) و الزواج يتم قانونيا أما في بلدك او في استراليا و يكون الزواج صادق Genuine و هدفه الزواج و الحياة الزوجية بكل مشتمالتها و ليس fفقط وسيلة للحصول على تأشيرة الزواج و تكونوا اتقابلتوا و عايشين سوا بشكل متقطع بسبب عدم وجود تأشيرة تسمحلك بالحياة بشكل متصل مع زوجتك في استراليا.

(اللي عاوز يعرف إجراءات الزواج من اجنبية في مصر يسيب تعليق و هاعمل edit للمنشور و أقوله).
فيه نوعين من أنواع فيزا الزواج من مواطنة استرالية أو مقيمة دايمة. 

(لو انتى بنت يبقى من مواطن أسترالي أو مقيم دائم. نفس الكلام. هتكلم عن الراجل اللي هيتجوز مواطنة لكن نفس الكلام بينطبق علي البنت اللي بتتجوز من مواطن استرالي)

اول نوع اللي بتقدم عليه من بره استراليا offshore و دي اسمها فيزا ١٠٠/٣٠٩ لو حضرتك بره و بتقدم من خارج استراليا. دول فيزتين ف بعض بتقدم عليهم مرة واحدة
و النوع التاني لو هتقدم ع الفيزا من داخل استراليا onshore و دي اسمها ٨٠١/٨٢٠ و برضو دول فيزتين في بعض بتقدم عليهم مرة واحدة

الفيزا سواء من الداخل أو الخارج تكلفتها 7715 دولار أسترالي 

ووبتملا طلبها اونلاين من خلال موقع الهجرة و حماية الحدود
www.immi.gov.au

انشيء حساب و تفتح new application و اختار 100/309 لو هاتقدم من بره استراليا أو 801/820 لو هتقدم من جوه استراليا

املا بياناتك و بيانات زوجتك و ادفع الرسوم (مفيش رسوم ع ال sponser اللي هو الزوجة الأجنبية هنا.. لحد دلوقتي) و سلم الطلب و ابدأ ارفع كل المستندات اللي بتأكد على أن زواجكم صادق و مستمر و معترف بيها قانونيا و عائليا و في أوساط المعارف و الأصدقاء. 

بعد ما بتسلم طلبك بيجيبك ايميل من الهجرة عن أنه تم استلام طلبك و بيتم تخصيص موظف ليك case officer يتابع طلبك و لو احتاج منك أي مستند بتخلصه و بترفقه 

و طبعا لازم كل حاجة تكون مترجمة للإنجليزية لو مش مترجمة للإنجليزية.
مع الوقت بيطلب منك كشف طبي ف جهة تابعة للهجرة ف بلدك بتخلصه. اي حاجة بتتطلب منك بتخلصها و ترفعها اونلاين في طلبك. 

الرد على طلبك بيكون خلال ١٣ ل ٢٣ شهر
طبعا على حسب قوة طلبك و المستندات اللي بتقدمها. 

طب ازاي تقدر تاخد فيزا الزواج؟
ال case officer بيبص على كام حاجة عشان يتأكد من مصداقية الزواج
اول حاجة أن الزواج قانوني و صادق و معترف بيها في البلد اللي تم فيها (مش شرط ف بلدك/ ممكن ف أي بلد طالما زواجكم تم بقانون البلد اللي تم فيها الزواج).

ترفق شهادة الزواج
ترفق اي مستند من محادثات الشات بينكم قبل الزواج. كيف تم التعارف. اي محادثات تليفونية. اي ايميلات و هكذا
لااااازم تكونوا اتقابلتم ف الحقيقة و عايشين مع بعض حتى بشكل متقطع بسبب عدم وجود فيزا تمكنك انك تدخل استراليا و تعيش مع زوجتك بشكل غير متقطع.

ارفق شهادات ميلاد الأبناء مترجمة.
صوركم سوا و انتوا بتتفسحوا بالتواريخ و تسلسلها
تاني حاجة الجانب الاجتماعي لزواجكم
يعني الزواج يكون معروف اجتماعيا للاهل و الأصدقاء .. عملت فرح و اخدتوا صور.
خلفت من زوجتك و عملت سبوع للابن .. ارفع الصور.
خرجتوا سوا مع الأصدقاء او حد اهلك و اهلها ارفع صور.
تالت حاجة الجانب المالي
لازم يكون بينكم تعامل مادي. بعتلها فلوس . حولتك فلوس.
فتحوا حساب بنكي باسمكم انتوا الاتنين. اشتريتوا حاجة باسمكم انتوا الاتنين. اشتريتلها هدية. خاتم زواج. خلي الفاتورة .
وصل نور وصل مية باسمكم و هكذا.
طبعا مش شرط كل دا. انا بديلكم امثلة.
لكن كل ما تكتر اثباتات كل ما تنجز نفسك و تأكد على مصداقية العلاقة الزوجية.
الحاجة الرابعة و الأخيرة هي شكل الحياة المنزلية household
مين بيعمل ايه ف البيت؟
مين بيحمي العيال؟ مين بيغسل المواعين؟ مين بيطبخ؟
بتساعدوا بعض ازاي ف الموضوع دا؟
صور و تاريخ و ارفع. صور كل حاجة.
فيه كام form نموذج بيتملي . انت بتملا نموذج (هاجيب اسمه قريب) و الزوجة بتملا نموذج اسمه form 47 دا Sponsorship من الزوجة الاسترالية
و فيه نموذجين form 888 دا عاوز اتنين أسترالييين (اهلها مثلا او أصدقائها) يملوه و يوثقوه certified copy أنهم عارفين بزواجكم و يقولوا كلمتين حلوين ف حقك.
كل دا بترفقه ف طلبك.

ممكن تحتاج قيد عائلي باسمك .. عشان يبين انت متجوز عليها و لا لاء.
استراليا قانونيا مش بتسمح بالتعدد و انت ف السفارة لو كتبت انك متجوز مش هايوفقوا يدولك شهادة عدم ممانعة و مش هايتم الزواج (دا تابع لإجراءات الزواج .. اللي حابب يقولي هاتكلم عنه بالتفصيل زي ما قلت فوق ف منشور منفصل).
كشف طبي ..و دا بيعملولك X ray تحليل urine . كشف عام ع الطول و الوزن و الصحة العامة .. تحليل HIV ايدز. كشف عن هل فيه سل رئوي او لاء. و هكذا.
كل دا بيطلب منها و بيتحددله وقت زمني معين لازم تخلصه فيه.
بيطلب منك biometrics رفع بصمات . بصمة صوت. بصمة عين. شكل خط ايدك. و هكذا
التكاليف دي كلها عليك. التراجم و الطبي. و الbiometrics و اي تكلفة استخراج اي شهادة.
بشكل عام. اي شيء بيطلب منك من موظف الهجرة بتخلصه و ترفعه على طلبك.
و تستني الرد.
ف حالة القبول بيتبعتلك جواب القبول Visa grant letter على ايميلك. فيه رقم فيزتك. و اي شروط.و حقوقك و هكذا. و تاريخ اول وصول ( لازم تعمل دخول اول قبله عشان متضيعش عليك الفيزا )
بعد كده بتستني السنتين من تاريخ تقديم الطلب. و بيتم منحك الإقامة الدايمة ف استراليا .
ف حالة الرفض بيتبعتلك Rejection letter و بيقولك ليه اترفضت ولو ليك حق ف طلب review للنتيجة.
تكلفة الفيزا غير مستردة.
الكلام دا بينطبق ف حالة انك متزوج /انكي متزوجة من مواطنة استرالية أو مقيمة دايمة/ مواطن أسترالي أو مقيم دايم. و لو حضرتك ف relationship يعني بويفريند و جيرل فريند.
لكن دي بتكون أصعب شوية لان محتاج تكونوا عيشتوا مع بعض بشكل دايم ع الأقل سنة ..و تثبت كل اللي فات بالمستندات. حياة كاملة. بس هي نفس الفيزا ال 100/309 و ال 801/820 و بيكون ف الحالة دي حضرتك في de facto relationship مع مواطنة استرالية أو مقيمة دايمة.
فيه فيزا خطوبة.. و دي بتسمحلك تدخل استراليا لو خاطب استرالية/ لو حضرتك بنت و مخطوبة لاسترالي ولازم يتم زواجك ف خلال ٩ شهور جوه استراليا.. و دي اسمها subclass 300.

تابعونا 

تمت الترجمه والمتابعه من قبل عرب كان ArabCan
منظمه رابطه الجاليات العربيه ArabCan
المركز العربي لشئون الهجره والتوطين
ArabCan - Arab Communities Association Network Org
www.ArabCan.net - www.ArabCan.org
E-mail : arabcan@gmail.com
Page www.facebook.com/ArabCan
Group www.facebook.com/groups/ArabCan